Xildhibaano aragtiyo ka dhiibtay wajiga labaad ee Shirka wada tashiga

Muqdisho: (Alxijaas) Xildhibaano ka tirsan barlamanka KMG Soomaaliya iyo Gudoomihii hore ee barlamanaka Puntland oo maanta ka qeyb qaatay barnaamijka dooda Jimcaha Shabelle ayaa aragtiyo kala duwan ka dhiibtay wajiga labaad ee Shirka wadatashiga Soomaaliya ee lagu wado inuu ka dhaco magaalada Garoowe.

Xili ay ka qeyb qaadanayeen Xildhibaanadaani ka tirsan barlamanka KMG Soomaaliya iyo Gudoomiyihii hore ee barlamanka Punland barnaamijka dooda jimcaha Shabelle oo maanta looga hadlayay wajiga labaad ee Shirka wadatashiga Soomaaliya ee lagu wado inuu ka dhaco magaalada Garoowe ayaa waxa ay kala dhiibteen fikrado kala duwan oo intooda badan lagu falan qeynayay wareega labaad ee Shirkaasi.

Xildhibaan Cali Max’ud Faarax (Seeko) oo dooda barnaamijka qeyb ka ahaa ayaa waxa uu sheegay in uu dhaliilsanaa wareegii koowaad ee Shirkaasi, isagoo tilmaamay in Shirkaasi aan lagu tilmaami karin Shir Soomaaliyeed kan iminka lagu qabanayo Garoowe uu yahay mid la mid ah kii hore ee magaalada Muqdisho lagu qabtay.

Gudoomiyihii hore ee barlamanaka Puntland Axmed Guure Aadan oo isna ka qeyb qaadanayay barnaamijka ayaa waxa uu sheegay inay haboon tahay in xiligaani lagu qabto magaalada Garoowe wajiga labaad ee Shirkaasi, isagoo tilmaamay in hadii lagu qaban waayo ay arintaasi tahay mid dibandaabyo ku ah shacabka ku nool deegaanada Maamulka Puntland.

Xildhibaan Max’ed Max’ud Xasan (Weekiyo) ayaa waxa uu isna sheegay in hadii Shirkaasi lagu qabto magaalada Garoowe aanay waxba soo kordheyn, waxaana uu carabka ku dhuftay in waxii kasoo baxa Shirkaasi hadii aan la horkeenin barlamanka KMG Soomaaliya aysan sharci ahaan doonin.

Xildhibaan Sheekh Axmed Maclin Yuusuf oo isna ka qeyb qaadanayay barnaamijka dooda jimcaha Shabelle ayaa waxa uu ku taliyay in la saxo qaladaadaka jira islamarkaana wareega labaad ee Shirkaasi laga qeyb galiyo xubnaha barlamanaka iyo qeybaha kala duwan ee bulshada si Shirkaasi uu u noqdo mid mira dhal ah oo ay kasoo baxaan waxyaabo muhiim ah.